ᠡᠷᠲᠡᠨ᠎ᠤ ᠦᠶ᠎ᠡ᠎ᠳᠤ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠴᠠᠭ᠎ᠤᠨ ᠬᠡᠮᠵᠢᠭᠦᠷ᠂ ᠤᠷᠳᠤ ᠵᠢᠨ ᠬᠡᠮᠵᠢᠭᠦᠷ᠂ ᠶᠡᠬᠡ ᠪᠠᠭ᠎ᠠ ᠵᠢᠨ ᠬᠡᠮᠨᠡᠭᠦᠷ ᠵᠡᠷᠭᠡ ᠪᠠᠭ᠋ᠠᠵᠢ ᠬᠡᠷᠡᠭᠰᠡᠯ᠎ᠢ ᠡᠭᠦᠳᠴᠦ ᠭᠠᠷᠭ᠋ᠠᠭ᠋ᠠᠳᠤᠢ ᠪᠠᠢ᠌ᠭᠰᠠᠨ ᠦᠶ᠎ᠡ᠎ᠳᠤ ᠤᠬᠠᠭ᠋ᠠᠨᠲᠤ ᠳᠡᠭᠡᠳᠦᠰ  ᠮᠢᠨᠢ  ᠪᠠᠢ᠌ᠭ᠋ᠠᠯᠢ  ᠣᠷᠴᠢᠨ᠎ᠤ  ᠬᠤᠪᠢᠷᠠᠯᠲᠠ᠂  ᠠᠮᠢᠳᠡᠡ ᠵᠢᠭᠦᠷᠲᠡᠨ᠎ᠤ  ᠲᠠᠭᠤ  ᠳᠦᠷᠰᠦ᠂  ᠪᠡᠶ᠎ᠡ ᠵᠢᠨ ᠡᠷᠬᠡᠲᠡᠨ ᠁ ᠵᠡᠷᠭᠡ ᠵᠢ ᠨᠠᠷᠢᠨ ᠭᠢᠷᠠᠬᠠᠢ᠌ᠯᠠᠵᠤ ᠠᠰᠢᠭᠯᠠᠨ ᠴᠠᠭ ᠬᠤᠭᠤᠴᠠᠭ᠎ᠠ᠂ ᠤᠷᠳᠤ ᠵᠢᠨ ᠬᠡᠮᠵᠢᠶ᠎ᠡ᠂ ᠶᠡᠬᠡ  ᠪᠠᠭ᠎ᠠ ᠵᠢᠨ ᠬᠡᠮᠵᠢᠶ᠎ᠡ ᠵᠡᠷᠭᠡ ᠵᠢ ᠬᠡᠮᠵᠢᠶᠡᠯᠡᠨ ᠲᠣᠭᠲᠠᠭ᠋ᠠᠳᠠᠭ ᠵᠠᠩ ᠦᠢ᠍ᠯᠡ ᠵᠢ ᠡᠭᠦᠳᠦᠨ ᠪᠦᠲᠦᠭᠡᠭᠰᠡᠨ ᠪᠠᠢ᠌ᠨ᠎ᠠ᠃ ᠡᠨᠡ ᠬᠦ᠌ ᠵᠠᠩ ᠦᠢ᠍ᠯᠡ᠎ᠨᠢ ᠲᠤᠬᠠᠢ ᠵᠢᠨ ᠦᠶ᠎ᠡ ᠎ᠳᠤ ᠬᠥᠮᠥᠰ᠎ᠤᠨ  ᠦᠢ᠍ᠯᠡᠳᠪᠦᠷᠢᠯᠡᠯ ᠠᠮᠢᠳᠤᠷᠠᠯ᠎ᠳᠤ ᠶᠡᠬᠡ ᠲᠥᠬᠦᠮ ᠦᠵᠡᠭᠦᠯᠦᠭᠰᠡᠨ ᠵᠶ᠋ᠠᠷ ᠥᠯᠤ ᠪᠠᠷᠠᠮ ᠮᠣᠩᠭᠣᠯ ᠬᠡᠯᠡᠨ᠎ᠤ ᠦᠭᠡᠰ᠎ᠤᠨ ᠰᠠᠩ᠎ᠢ ᠪᠠᠶᠠᠯᠢᠭᠵᠢᠭᠤᠯᠵᠤ᠂ ᠣᠳᠣᠬᠠᠨ᠎ᠳᠤ  ᠬᠥᠷᠳᠡᠯ᠎ᠠ ᠤᠯᠠᠮᠵᠢᠯᠠᠭᠳᠠᠨ ᠬᠡᠷᠡᠭᠯᠡᠭᠳᠡᠭᠰᠡᠭᠡᠷ ᠪᠠᠢ᠌ᠨ᠎ᠠ᠃       

ᠨᠢᠭᠡ᠂ ᠪᠡᠶ᠎ᠡ ᠵᠢᠨ ᠡᠷᠬᠡᠲᠡᠨ ᠵᠶ᠋ᠠᠷ ᠵᠶ᠋ᠠᠨ ᠬᠡᠮᠵᠢᠶᠡᠯᠡᠬᠦ ᠬᠡᠮᠨᠡᠭᠦᠷ ᠦᠭᠡᠰ᠄

1᠂ ᠠᠯᠳᠠ᠄ ᠲᠣᠮᠣᠴᠤᠤᠯ᠎ᠤᠨ ᠪᠠᠷᠠᠭᠤᠨ ᠭᠠᠷ᠎ᠤᠨ ᠳᠤᠮᠳᠠ ᠬᠤᠷᠤᠭᠤᠨ᠎ᠤ  ᠦᠵᠦᠭᠦᠷ᠎ᠠᠴᠠ ᠵᠡᠭᠦᠨ  ᠭᠠᠷ᠎ᠤᠨ ᠳᠤᠮᠳᠠ ᠬᠤᠷᠤᠭᠤᠨ᠎ᠤ ᠦᠵᠦᠭᠦᠷ ᠬᠥᠷᠳᠡᠯ᠎ᠠ ᠳᠡᠯᠡᠭᠰᠡᠨ ᠵᠠᠢ ᠵᠢ ᠠᠯᠳᠠ ᠭᠡᠨ᠎ᠡ᠃ ᠨᠢᠭᠡ ᠠᠯᠳᠠ᠎ᠨᠢ ᠪᠠᠷᠤᠭ 5 ᠲᠣᠬᠣᠢ  ᠣᠷᠴᠢᠮ ᠪᠠᠢ᠌ᠳᠠᠭ᠃ 

2᠂ ᠲᠠᠯᠢᠮ᠄ ᠲᠣᠮᠣᠴᠤᠤᠯ᠎ᠤᠨ ᠪᠡᠶ᠎ᠡ ᠵᠢᠨ ᠭᠣᠣᠯ ᠳᠤᠮᠳᠠ᠎ᠠᠴᠠ ᠨᠢᠭᠡ ᠭᠠᠷ᠎ᠤᠨ ᠳᠤᠮᠳᠠ ᠬᠤᠷᠤᠭᠤᠨ᠎ᠤ ᠦᠵᠦᠭᠦᠷ ᠬᠦᠷᠬᠦ ᠵᠠᠢ ᠵᠢ  ᠳᠠᠯᠢᠮ ᠭᠡᠨ᠎ᠡ᠃ ᠬᠠᠭ᠋ᠠᠰ ᠠᠯᠳᠠ᠎ᠲᠠᠢ ᠲᠡᠩᠴᠡᠳᠡᠭ᠃ 

3᠂ ᠲᠣᠬᠣᠢ᠄ ᠲᠣᠮᠣᠴᠤᠤᠯ᠎ᠤᠨ ᠲᠣᠬᠣᠢ ᠵᠢᠨ ᠦᠵᠦᠭᠦᠷ᠎ᠠᠴᠠ ᠨᠢᠳᠤᠷᠭ᠋ᠠᠨ᠎ᠤ ᠦᠵᠦᠭᠦᠷ ᠬᠦᠷᠬᠦ ᠵᠠᠢ ᠵᠢ ᠲᠣᠬᠣᠢ ᠭᠡᠨ᠎ᠡ᠃

4᠂ ᠲᠥᠭᠡ᠄ ᠭᠠᠷ᠎ᠤᠨ ᠳᠤᠮᠳᠠ ᠬᠤᠷᠤᠭᠤ ᠪᠣᠯᠣᠨ ᠡᠷᠡᠬᠡᠢ ᠬᠤᠷᠤᠭᠤᠨ᠎ᠤ ᠳᠡᠯᠡᠭᠰᠡᠨ ᠵᠠᠢ ᠵᠢ ᠲᠥᠭᠡ ᠭᠡᠨ᠎ᠡ᠃ 

5᠂ ᠰᠥᠭᠥᠮ᠄ ᠭᠠᠷ᠎ᠤᠨ  ᠬᠣᠮᠣᠬᠠᠢ ᠬᠤᠷᠤᠭᠤ ᠪᠣᠯᠣᠨ ᠡᠷᠡᠬᠡᠢ ᠬᠤᠷᠤᠭᠤᠨ᠎ᠤ ᠳᠡᠯᠡᠭᠰᠡᠨ ᠵᠠᠢ ᠵᠢ ᠰᠥᠭᠥᠮ ᠭᠡᠨ᠎ᠡ᠃ 

6᠂ ᠮᠤᠬᠤᠷ ᠰᠥᠭᠥᠮ᠄ ᠭᠠᠷ᠎ᠤᠨ ᠬᠣᠮᠣᠬᠠᠢ ᠬᠤᠷᠤᠭᠤᠨ᠎ᠤ ᠳᠤᠮᠳᠠ  ᠦᠶ᠎ᠡ ᠪᠣᠯᠣᠨ ᠡᠷᠡᠬᠡᠢ ᠬᠤᠷᠤᠭᠤᠨ᠎ᠤ ᠳᠡᠯᠡᠭᠰᠡᠨ ᠵᠠᠢ ᠵᠢ ᠮᠤᠬᠤᠷ ᠰᠥᠭᠥᠮ ᠭᠡᠨ᠎ᠡ᠃ 

7᠂ ᠢᠮᠠᠬᠤ᠄ ᠭᠠᠷ᠎ᠤᠨ ᠳᠤᠮᠳᠠ ᠬᠤᠷᠤᠭᠤᠨ᠎ᠤ ᠳᠤᠮᠳᠠ ᠦᠶ᠎ᠡ ᠵᠢᠨ  ᠤᠷᠲᠤ ᠵᠢ ᠢᠮᠠᠬᠤ ᠭᠡᠨ᠎ᠡ᠃

8᠂ ᠴᠢᠮᠬᠢ᠄ ᠡᠷᠡᠬᠡᠢ ᠬᠤᠷᠤᠭᠤ ᠪᠣᠯᠣᠨ ᠬᠣᠮᠣᠬᠠᠢ ᠬᠤᠷᠤᠭᠤ᠎ᠪᠠᠷ ᠵᠶ᠋ᠠᠨ ᠴᠢᠮᠬᠢᠵᠦ ᠠᠪᠤᠭᠰᠠᠨ᠎ᠢ ᠴᠢᠮᠬᠢ ᠭᠡᠨ᠎ᠡ᠃ ᠨᠢᠭᠡ ᠴᠢᠮᠬᠢ  ᠭᠤᠯᠢᠷ᠂ ᠨᠢᠭᠡ ᠴᠢᠮᠬᠢ ᠠᠮᠤ ᠭᠡᠬᠦ ᠮᠡᠲᠦ᠃ 

 9᠂ ᠠᠳᠬᠤ᠄ ᠨᠢᠭᠡ ᠭᠠᠷ ᠵᠶ᠋ᠠᠷ ᠵᠶ᠋ᠠᠨ ᠤᠳᠬᠤᠵᠤ ᠠᠪᠤᠭᠰᠠᠨ᠎ᠢ ᠠᠳᠬᠤ ᠭᠡᠨ᠎ᠡ᠃ ᠨᠢᠭᠡ ᠠᠳᠬᠤ ᠪᠤᠳᠠᠭ᠎ᠠ᠂ ᠨᠢᠭᠡ  ᠠᠳᠬᠤ ᠭᠤᠯᠢᠷ ᠭᠡᠬᠦ ᠮᠡᠲᠦ᠃ 

 10᠂ ᠪᠢᠲᠡᠭᠦᠦ᠄ ᠬᠣᠶᠠᠷ ᠭᠠᠷ ᠵᠶ᠋ᠠᠨ ᠨᠡᠢ᠌ᠯᠡᠭᠦᠯᠵᠦ ᠪᠠᠢ᠌ᠭ᠋ᠠᠳ ᠤᠳᠬᠤᠵᠤ ᠠᠪᠤᠭᠰᠠᠨ᠎ᠢ ᠨᠢᠭᠡ ᠪᠢᠲᠡᠭᠦᠦ ᠭᠡᠨ᠎ᠡ᠃ ᠨᠢᠭᠡ  ᠪᠢᠲᠡᠭᠦᠦ ᠠᠮᠤ ᠭᠡᠬᠦ ᠮᠡᠲᠦ᠃ 

 11᠂ ᠲᠡᠪᠡᠷᠢ᠄ ᠬᠣᠶᠠᠷ ᠭᠠᠷ ᠵᠶ᠋ᠠᠷ ᠵᠶ᠋ᠠᠨ ᠲᠡᠪᠡᠷᠢᠵᠦ ᠠᠪᠤᠭᠰᠠᠨ᠎ᠢ ᠲᠡᠪᠡᠷᠢ ᠭᠡᠨ᠎ᠡ᠃ ᠨᠢᠭᠡ ᠲᠡᠪᠡᠷᠢ ᠲᠦᠯᠡᠭᠡ᠂ ᠲᠡᠪᠡᠷᠢ ᠪᠦᠳᠦᠭᠦᠨ  ᠮᠣᠳᠣ ᠭᠡᠬᠦ ᠮᠡᠲᠦ᠃ 

 12᠂ ᠨᠢᠭᠡ ᠡᠮᠬᠦ᠂ ᠨᠢᠭᠡ ᠣᠭᠣᠴᠢ᠄ ᠠᠮᠠ ᠳᠦᠭᠦᠷᠲᠡᠯ᠎ᠡ ᠡᠮᠬᠦᠭᠰᠡᠨ ᠪᠤᠶᠤ ᠣᠭᠣᠴᠢᠭᠰᠠᠨ᠎ᠢ ᠨᠢᠭᠡ ᠡᠮᠬᠦ ᠪᠤᠶᠤ ᠨᠢᠭᠡ ᠣᠭᠣᠴᠢ ᠭᠡᠨ᠎ᠡ᠃  ᠨᠢᠭᠡ ᠡᠮᠬᠦ ᠪᠤᠳᠠᠭ᠎ᠠ᠂ ᠨᠢᠭᠡ ᠣᠭᠣᠴᠢ ᠤᠰᠤ ᠭᠡᠬᠦ ᠮᠡᠲᠦ᠃ 

 13᠂ ᠠᠯᠠᠭ᠋ᠠᠨ ᠬᠢᠷᠢ᠂ ᠨᠢᠳᠦᠨ ᠴᠢᠨᠡᠭᠡᠨ᠄ ᠲᠤᠩ ᠵᠢᠭ᠋ᠠᠬᠠᠨ ᠶᠠᠭᠤᠮ᠎ᠠ ᠵᠢ ᠬᠡᠯᠡᠨ᠎ᠡ᠃ ᠠᠯᠠᠭ᠋ᠠᠨ  ᠬᠢᠷᠢ ᠭᠠᠵᠠᠷ᠂ ᠨᠢᠳᠦᠨ ᠴᠢᠨᠡᠭᠡᠨ ᠠᠶᠠᠭ᠎ᠠ ᠭᠡᠬᠦ ᠮᠡᠲᠦ᠃        

  ᠬᠣᠶᠠᠷ᠂ ᠪᠠᠢ᠌ᠭ᠋ᠠᠯᠢ ᠵᠢᠨ ᠬᠤᠪᠢᠷᠠᠯᠲᠠ᠂ ᠠᠮᠢᠳᠠᠠ᠎ᠤ ᠲᠠᠭᠤ ᠳᠦᠷᠰᠦ᠎ᠪᠠᠷ  ᠬᠡᠮᠵᠢᠶᠡᠯᠡᠭᠰᠡᠨ ᠬᠡᠮᠨᠡᠭᠦᠷ ᠦᠭᠡᠰ᠄ 

 1᠂ ᠴᠠᠭ᠎ᠤᠨ ᠬᠡᠮᠨᠡᠭᠦᠷ ᠦᠭᠡ᠄  ᠲᠠᠬᠢᠶ᠎ᠠ ᠲᠥᠷᠤᠬᠦᠤ ᠳᠤᠤᠭ᠋ᠠᠷᠬᠤ ᠦᠶ᠎ᠡ᠂ ᠴᠣᠯᠮᠣᠨ ᠭᠠᠷᠬᠤ ᠦᠶ᠎ᠡ᠂ ᠦᠦᠷ᠎ᠤᠨ ᠭᠡᠭᠡ ᠰᠤᠪᠤᠷᠠᠬᠤ ᠦᠶ᠎ᠡ᠂ ᠠᠯᠠᠭ᠋ᠠᠨ ᠵᠢᠷᠤᠭ᠋ᠠᠰᠤ ᠬᠠᠷᠠᠭᠳᠠᠬᠤ ᠦᠶ᠎ᠡ᠂ ᠰᠢᠷ᠎ᠠ  ᠪᠦᠷᠦᠢ᠂ ᠬᠠᠷ᠎ᠠ ᠪᠦᠷᠦᠢ᠂ ᠦᠳᠡ ᠬᠡᠯᠪᠡᠢ᠌ᠬᠦ ᠦᠶ᠎ᠡ᠂  ᠨᠠᠷᠠ ᠠᠯᠳᠠ ᠳᠡᠭᠡᠷ᠎ᠡ ᠮᠠᠨᠳᠤᠬᠤ ᠭᠡᠬᠦ ᠮᠡᠲᠦ᠃ 

 2᠂ ᠴᠠᠭ ᠤᠯᠠᠷᠢᠯ᠎ᠤᠨ ᠬᠡᠮᠨᠡᠭᠦᠷ ᠦᠭᠡ᠄ ᠭᠠᠵᠠᠷ  ᠡᠬᠢᠯᠡᠵᠦ ᠭᠡᠰᠬᠦ᠎ᠳᠤ᠂ ᠬᠠᠭᠳᠠ ᠬᠥᠬᠡᠷᠡᠬᠦ᠎ᠳᠤ᠂ ᠠᠬᠢ ᠨᠢᠳᠦᠯᠡᠬᠦ᠎ᠳᠤ᠂ ᠢᠮᠠᠭ᠎ᠠ ᠰᠠᠮᠨᠠᠬᠤ ᠦᠶ᠎ᠡ᠂ ᠭᠠᠵᠠᠷ ᠬᠥᠯᠳᠡᠬᠦ ᠦᠶ᠎ᠡ ᠭᠡᠬᠦ ᠮᠡᠲᠦ᠃ 

 3᠂ ᠥᠨᠳᠥᠷ ᠪᠣᠭᠣᠨᠢ  ᠭᠦᠨ ᠭᠦᠢ᠍ᠬᠡᠨ᠎ᠤ ᠬᠡᠮᠨᠡᠭᠦᠷ ᠦᠭᠡ᠄ ᠡᠪᠦᠳᠦᠭ ᠲᠤᠯᠤᠮ᠎ᠠ ᠭᠦᠨ᠂ ᠲᠥᠷᠤᠭᠡ ᠰᠢᠭᠦᠷᠡᠮ᠎ᠡ ᠥᠨᠳᠥᠷ᠂ ᠮᠣᠷᠢᠨ ᠨᠢᠷᠤᠭᠤ ᠳᠠᠪᠠᠮ᠎ᠠ ᠥᠨᠳᠥᠷ᠂ ᠪᠦᠰᠡᠯᠡᠭᠦᠷ ᠲᠤᠯᠤᠮ᠎ᠠ  ᠤᠰᠤ ᠭᠡᠬᠦ ᠮᠡᠲᠦ᠃