ᠪᠢ ᠥᠪᠡᠷᠤᠨ ᠵᠶ᠋ᠠᠨ ᠣᠷᠣᠰᠢᠬᠤᠢ
ᠨᠡᠶ᠋ᠢᠲᠡᠯᠡᠭᠰᠡᠨ ᠴᠠᠭ᠄ 2024-08-29
ᠵᠣᠬᠢᠶᠠᠭᠴᠢ᠄ ᠪ᠊ · ᠰ᠊· ᠪᠢᠯᠢᠭᠡᠷᠭᠢᠮ
ᠡᠷᠢᠯᠤᠨ ᠬᠠᠪᠤᠷ ᠡᠪᠡᠰᠦ ᠵᠢ ᠦᠭᠡᠢ᠌ᠯᠡᠭᠡᠳ ᠰᠠᠯᠬᠢ ᠢᠯᠪᠢᠨ ᠨᠣᠭᠣᠭ᠋ᠠᠷᠠᠬᠤ ᠮᠡᠲᠦ
ᠡᠩᠭᠡᠷᠤᠨ ᠬᠢᠨᠢ ᠴᠡᠴᠡᠭᠡᠰ ᠵᠤᠨᠤ ᠵᠡᠭᠦᠳᠦᠪᠠᠷ ᠢᠭᠳᠦᠯᠦᠨ ᠨᠠᠭ᠋ᠠᠰᠢᠯᠠᠬᠤ ᠮᠡᠲᠦ
ᠡᠭᠦᠳᠡᠨ ᠳᠡᠭᠡᠷᠡ ᠣᠨ ᠵᠢᠯ ᠤᠷᠤᠰᠴᠤ ᠡᠮᠵᠡᠭ ᠪᠤᠷᠤᠭᠤ ᠵᠢ ᠲᠡᠭᠰᠢᠳᠬᠡᠬᠦ ᠮᠡᠲᠦ
ᠡᠨᠳᠡᠭᠦᠷᠡᠯ ᠠᠯᠲᠠᠷᠬᠠᠤ ᠥᠨᠥᠳᠥᠷ ᠡᠩᠬᠡ ᠲᠤᠩᠬᠠ ᠮᠠᠷᠭ᠋ᠠᠰᠢᠳᠤ ᠲᠡᠮᠡᠦᠯᠬᠦ ᠮᠡᠲᠦ
ᠡᠪᠦᠭᠡᠳᠤᠨ ᠴᠢᠯᠠᠭᠤᠨᠤ ᠬᠡᠯᠲᠡᠷᠬᠡᠢ ᠰᠢᠭ ᠪᠢ ᠥᠪᠡᠷᠤᠨ ᠵᠶ᠋ᠠᠨ ᠣᠷᠣᠰᠢᠬᠤᠢ
ᠬᠤᠷᠠᠭ᠋ᠠᠨ ᠡᠭᠦᠯᠡᠰ ᠡᠬᠡ ᠭᠠᠵᠠᠷ ᠵᠦᠰᠡᠷᠡᠬᠦ ᠬᠥᠬᠡ ᠠᠭᠤᠯᠠᠰᠤᠨ ᠵᠡᠭᠦᠳᠦ ᠮᠡᠲᠦ
ᠬᠤᠨᠢᠨ ᠡᠯᠢᠭᠡᠨᠳᠤ ᠨᠡᠪᠲᠡᠷᠡᠬᠦ ᠭᠠᠵᠠᠷᠤᠨ ᠠᠮᠢᠰᠬᠤᠭᠠ ᠬᠤᠷᠠ ᠤᠰᠤᠨ ᠮᠡᠲᠦ
ᠬᠣᠷᠭᠣᠢ ᠢᠷᠭᠤᠢ ᠬᠥᠳᠡᠭᠡ ᠵᠢᠨ ᠵᠡᠷᠭᠡᠯᠭᠡ ᠲᠠᠯᠠ ᠵᠢᠨ ᠴᠠᠭ᠋ᠠᠨ ᠭᠡᠷ ᠮᠡᠲᠦ
ᠬᠠᠯᠢᠭᠤᠨ ᠵᠡᠭᠡᠷᠳᠡ ᠵᠢᠨ ᠲᠠᠢ᠌ᠪᠤᠩ ᠦᠦᠷᠰᠡᠭᠡ ᠲᠡᠭᠷᠢ ᠵᠢᠨ ᠠᠨᠢᠷ ᠮᠡᠲᠦ
ᠬᠠᠩᠭ᠋ᠠᠢ ᠵᠢᠨ ᠰᠠᠯᠬᠢᠨᠤ ᠲᠠᠰᠤᠷᠬᠠᠢ ᠰᠢᠭ᠋ ᠪᠢ ᠥᠪᠡᠷᠤᠨ ᠵᠶ᠋ᠠᠨ ᠣᠷᠣᠰᠢᠬᠤᠢ
ᠠᠯᠢᠮᠠᠨ ᠬᠠᠴᠠᠷᠲᠠᠢ ᠨᠠᠷᠠᠨᠤ ᠬᠡᠦᠬᠡᠨ ᠨᠠᠮᠠᠶ᠋ᠢ ᠬᠥᠭᠡᠷᠦᠬᠦᠢ᠌ᠯᠡᠨ ᠬᠠᠢ᠌ᠷᠠᠯᠠᠬᠤ ᠮᠡᠲᠦ
ᠠᠢ᠌ᠯᠤᠨ ᠬᠣᠢ᠌ᠮᠤᠷᠲᠤ ᠠᠪᠤ ᠮᠢᠨᠢ ᠰᠠᠬᠠᠯ ᠰᠢᠪᠲᠤᠷᠠᠵᠤ ᠵᠢᠷᠠᠨ ᠵᠢᠰᠦ ᠬᠠᠢ᠌ᠬᠤ ᠮᠡᠲᠦ
ᠠᠯᠮᠠᠩ ᠰᠠᠷᠠᠨᠤ ᠠᠷᠢᠭ ᠰᠢᠭᠦᠳᠡᠷᠢ ᠨᠠᠪᠴᠢᠨ ᠳᠡᠭᠡᠷᠡ ᠭᠢᠯᠠᠯᠵᠠᠨ ᠢᠨᠢᠶᠡᠬᠦ ᠮᠡᠲᠦ
ᠠᠭ᠋ᠠᠷᠤᠨ ᠣᠳᠣᠳᠢ ᠠᠷᠭ᠋ᠠᠳᠠᠵᠤ ᠡᠵᠢ ᠮᠢᠨᠢ ᠵᠡᠯᠡᠨᠤ ᠰᠠᠭ᠋ᠠᠯᠢ ᠢᠷᠠᠬᠤ ᠮᠡᠲᠦ
ᠠᠰᠠᠭ᠋ᠠᠭᠰᠠᠨ ᠠᠷᠭ᠋ᠠᠯᠤᠨ ᠤᠲᠤᠭᠠ ᠰᠢᠭ᠋ ᠪᠢ ᠥᠪᠡᠷᠤᠨ ᠵᠶ᠋ᠠᠨ ᠣᠷᠣᠰᠢᠬᠤᠢ
ᠨᠡᠭᠦᠳᠡᠯᠤᠨ ᠵᠥᠷᠢᠭ ᠵᠦᠯᠭᠡᠨᠤ ᠠᠮᠤᠭᠤᠯᠠᠩᠳᠤ ᠠᠶᠠᠷᠬᠠᠨ ᠲᠤᠨᠤᠯᠵᠠᠬᠤ ᠮᠡᠲᠦ
ᠨᠢᠭᠡᠨ ᠭᠣᠣᠯᠤᠨ ᠭᠦᠪᠡᠭᠡᠳᠤ ᠭᠠᠯᠤᠨ ᠠᠬᠠ ᠵᠢᠩᠤᠨ ᠴᠠᠢ ᠠᠮᠰᠠᠬᠤ ᠮᠡᠲᠦ
ᠨᠢᠭᠦᠯᠡᠰᠦᠩᠭᠦᠢ ᠵᠢᠨ ᠬᠢᠵᠠᠭ᠋ᠠᠷ ᠬᠣᠷᠸᠠ ᠵᠢᠨ ᠦᠵᠡᠰᠭᠦᠯᠡᠩ ᠪᠦᠭᠦᠨ ᠲᠥᠷᠥᠭᠳᠡᠬᠦ ᠮᠡᠲᠦ
ᠨᠢᠩᠵᠢᠨ ᠵᠤᠨᠤ ᠦᠵᠦᠭᠦᠷ ᠵᠠᠯᠭ᠋ᠠᠵᠤ ᠠᠮᠠᠷᠠᠭᠤᠨ ᠮᠢᠨᠢ ᠠᠯᠴᠢᠭᠤᠷ ᠨᠠᠮᠢᠷᠠᠬᠤ ᠮᠡᠲᠦ
ᠨᠠᠭᠤᠷᠤᠨ ᠵᠡᠭᠡᠰᠦᠨᠤ ᠨᠣᠮᠢᠨ ᠳᠠᠪᠠᠯᠭᠠ ᠰᠢᠭ᠋ ᠪᠢ ᠥᠪᠡᠷᠤᠨ ᠵᠶ᠋ᠠᠨ ᠣᠷᠣᠰᠢᠬᠤᠢ
ᠠᠯᠠᠭ᠋ᠠᠨᠠᠴᠠ ᠠᠯᠲᠠᠷᠬᠠᠤ ᠴᠠᠭ ᠬᠤᠭᠤᠴᠠᠭᠠ ᠨᠠᠮᠠᠶ᠋ᠢ ᠬᠥᠲᠥᠯᠵᠦ ᠠᠶᠠᠷᠯᠠᠬᠤ ᠮᠡᠲᠦ
ᠠᠰᠢᠳᠠ ᠵᠢᠨ ᠭᠡᠵᠦ ᠠᠯᠠᠭᠠ ᠪᠠᠢ᠌ᠳᠠᠭ ᠪᠦᠳᠡᠭᠢ ᠶᠢᠷᠲᠢᠨᠴᠦ ᠮᠢᠨᠤᠬᠢ ᠪᠢᠰᠢ ᠮᠡᠲᠦ
ᠠᠬᠢᠨ ᠠᠬᠢᠨ ᠮᠥᠷᠥᠭᠡᠳᠬᠦᠪᠠᠷ ᠠᠷᠤ ᠵᠢᠨ ᠬᠠᠩᠭ᠋ᠠᠢ ᠮᠢᠨᠢ ᠠᠰᠢᠳᠠ ᠵᠢᠨ ᠮᠡᠲᠦ
ᠠᠭ᠋ᠠᠷ ᠣᠭᠲᠠᠷᠭᠤᠢ ᠪᠤᠶᠤ ᠤᠰᠤ ᠮᠥᠷᠡᠨ ᠠᠢ᠌ᠷᠠᠭ ᠲᠠᠷᠠᠭ ᠰᠢᠭ᠋ ᠠᠩᠬᠢᠯᠬᠤ ᠮᠡᠲᠦ
ᠠᠰᠠᠭᠤᠵᠤ ᠡᠰᠡ ᠴᠢᠳᠠᠬᠤ ᠠᠰᠠᠭᠤᠯᠲᠠ ᠰᠢᠭ᠋ ᠪᠢ ᠥᠪᠡᠷᠤᠨ ᠵᠶ᠋ᠠᠨ ᠣᠷᠣᠰᠢᠬᠤᠢ
ᠭᠠᠭᠴᠠ ᠪᠠᠢ᠌ᠳᠠᠭ ᠪᠤᠷᠬᠠᠨ ᠨᠤᠲᠤᠭ ᠡᠭᠦᠷᠢᠳᠡ ᠪᠥᠬᠥᠰᠢ ᠦᠭᠡᠢ ᠤᠷᠭᠤᠳᠠᠭ ᠮᠡᠲᠦ
ᠭᠠᠴᠠᠭ᠋ᠠᠨᠤ ᠬᠥᠮᠥᠰ ᠭᠠᠷ ᠭᠠᠷ ᠳᠡᠭᠡᠷᠡᠪᠠᠨ ᠭᠠᠪᠰᠢᠭ᠋ᠠᠢ ᠵᠢ ᠤᠬᠠᠭ᠋ᠠᠷᠠᠳᠠᠭ ᠮᠡᠲᠦ
ᠭᠠᠵᠠᠷᠤᠨ ᠠᠮᠢ ᠪᠤᠯᠭ᠋ᠠᠵᠤ ᠭᠠᠷᠤᠨ ᠬᠤᠷᠤᠭᠤᠪᠠᠨ ᠲᠠᠮᠠᠭ᠋ᠠᠯᠠᠵᠤ ᠳᠠᠷᠤᠬᠤ ᠮᠡᠲᠦ
ᠭᠠᠯᠪᠠ ᠵᠢᠨ ᠪᠣᠯᠵᠣᠭᠠ ᠪᠣᠯᠭ᠋ᠠᠨ ᠭᠠᠩᠭ᠋ᠠᠩ ᠮᠠᠷᠭ᠋ᠠᠰᠢᠪᠠᠨ ᠰᠡᠬᠦᠵᠦ ᠲᠠᠯᠪᠢᠬᠤ ᠮᠡᠲᠦ
ᠭᠠᠵᠠᠷᠳᠠᠵᠤ ᠦᠯᠦ ᠪᠤᠯᠬᠤ ᠬᠠᠷᠢᠭᠤᠯᠲᠠ ᠰᠢᠭ᠋ ᠪᠢ ᠥᠪᠡᠷᠤᠨ ᠵᠶ᠋ᠠᠨ ᠣᠷᠣᠰᠢᠬᠤᠢ
ᠢᠷᠡᠯᠲᠡ᠄ ᠥᠪᠥᠷ ᠮᠣᠩᠭᠣᠯᠤᠨ ᠡᠳᠦᠷᠤᠨ ᠰᠣᠨᠢᠨ