ᠬᠠᠲᠤᠨ ᠭᠣᠣᠯᠤᠨ ᠨᠢᠭᠡᠳᠥᠭᠡᠷ ᠬᠠᠰᠢᠯᠭᠠ — ᠰᠠᠨ ᠱᠧᠩ ᠭᠦᠩᠤᠨ ᠤᠰᠤᠨ ᠠᠰᠢᠭᠯᠠᠯᠲᠠ ᠵᠢᠨ ᠬᠦᠢ᠍ᠰᠦ ᠪᠠᠷᠢᠯᠭᠠ
ᠨᠡᠶ᠋ᠢᠲᠡᠯᠡᠭᠰᠡᠨ ᠴᠠᠭ᠄ 2021-11-25
ᠬᠠᠲᠤᠨ ᠭᠣᠣᠯᠤᠨ ᠰᠠᠨ ᠱᠧᠩ ᠭᠦᠩᠳᠠᠬᠢ ᠤᠯᠤᠰᠤᠨ ᠤᠰᠤᠨ ᠠᠰᠢᠭᠯᠠᠯᠲᠠ ᠵᠢᠨ ᠦᠵᠡᠮᠵᠢ ᠵᠢᠨ ᠣᠷᠣᠨᠨᠢ ᠳ᠋ᠧᠩᠺᠧᠦ ᠰᠢᠶᠠᠨᠤ ᠪᠠᠶᠠᠨᠭᠣᠣᠯ ᠪᠠᠯᠭ᠋ᠠᠰᠤ ᠵᠢᠨ ᠵᠡᠭᠦᠨ ᠡᠮᠦᠨᠡ 2 ᠺᠢᠯᠣᠮᠧᠲᠷᠤᠨ ᠵᠠᠢᠳᠤ ᠪᠠᠶ᠋ᠢᠷᠢᠯᠠᠵᠤ᠂ ᠰᠠᠨ ᠱᠧᠩ ᠭᠦᠩᠤᠨ ᠤᠰᠤᠨ ᠠᠰᠢᠭᠯᠠᠯᠲᠠ ᠵᠢᠨ ᠬᠦᠢ᠍ᠰᠦ ᠪᠠᠷᠢᠯᠭᠠᠳᠤ ᠲᠦᠰᠢᠭᠯᠡᠨ ᠪᠠᠶ᠋ᠢᠭᠤᠯᠵᠤ᠂ ᠤᠯᠤᠰᠤᠨ ᠳᠣᠲᠣᠭ᠋ᠠᠳᠤ ᠭᠠᠳᠠᠭ᠋ᠠᠳᠤᠳᠤ ᠠᠯᠳᠠᠷ ᠨᠡᠷᠡᠪᠠᠨ ᠮᠠᠨᠳᠤᠭᠤᠯᠵᠤ ᠪᠠᠶ᠋ᠢᠳᠠᠭ᠃ ᠬᠦᠢ᠍ᠰᠦ ᠪᠠᠷᠢᠯᠭᠠ ᠵᠢ 1959 ᠣᠨᠳᠤ ᠡᠬᠢᠯᠡᠨ ᠪᠠᠶ᠋ᠢᠭᠤᠯᠵᠤ᠂ 1961 ᠣᠨᠳᠤ ᠪᠠᠶ᠋ᠢᠭᠤᠯᠤᠨ ᠲᠡᠭᠦᠰᠬᠡᠵᠡᠢ᠃ ᠲᠤᠰ ᠪᠠᠷᠢᠯᠭᠠ ᠪᠣᠯ ᠠᠽᠢᠶᠠ ᠲᠢᠪᠤᠨ ᠬᠠᠮᠤᠭ ᠶᠡᠬᠡ᠂ ᠬᠠᠲᠤᠨ ᠭᠣᠣᠯ ᠳᠡᠭᠡᠷᠡᠬᠢ ᠴᠣᠷᠤᠨ ᠭᠠᠭᠴᠠ ᠤᠰᠤᠯᠠᠯᠲᠠᠪᠠᠷ ᠭᠣᠣᠯ ᠪᠣᠯᠭ᠋ᠠᠭᠰᠠᠨ ᠨᠢᠭᠡ ᠡᠬᠢᠲᠦ ᠲᠣᠮᠣ ᠬᠡᠯᠪᠡᠷᠢ ᠵᠢᠨ ᠤᠰᠤᠯᠠᠯᠲᠠ ᠵᠢᠨ ᠣᠷᠣᠨᠤ ᠬᠠᠰᠢᠯᠭᠠ ᠵᠢᠨ ᠪᠠᠷᠢᠯᠭᠠ ᠪᠠᠶ᠋ᠢᠵᠤ᠂ 《ᠬᠠᠲᠤᠨ ᠭᠣᠣᠯᠤᠨ ᠨᠢᠭᠡᠳᠥᠭᠡᠷ ᠬᠠᠰᠢᠯᠭᠠ》 ᠭᠡᠰᠡᠨ ᠠᠯᠳᠠᠷᠲᠠᠢ ᠪᠢᠯᠡ᠃ ᠲᠤᠰ ᠬᠠᠰᠢᠯᠭᠠᠨᠢ ᠪᠠᠰᠠ ᠵᠠᠮ ᠬᠠᠷᠢᠯᠴᠠᠭᠠ᠂ ᠴᠠᠬᠢᠯᠭ᠋ᠠᠨ ᠭᠠᠷᠭ᠋ᠠᠬᠤ ᠪᠠ ᠵᠤᠭ᠋ᠠᠴᠠᠯ ᠵᠡᠷᠭᠡ ᠣᠯᠠᠨ ᠴᠢᠳᠠᠪᠬᠢᠲᠠᠢ ᠪᠠᠶ᠋ᠢᠳᠠᠭ᠃
ᠲᠤᠰ ᠬᠦᠢ᠍ᠰᠦ ᠪᠠᠷᠢᠯᠭᠠ ᠵᠢᠨ ᠪᠠᠶ᠋ᠢᠭᠤᠯᠤᠭᠳᠠᠭᠰᠠᠨᠨᠢ 《ᠳᠠᠶᠠᠩᠳᠤ ᠠᠯᠳᠠᠷᠲᠠᠢ ᠬᠠᠲᠤᠨ ᠭᠣᠣᠯ᠂ ᠲᠠᠩᠰᠤᠭ ᠪᠣᠷᠣᠲᠣᠬᠣᠢ ᠵᠢ ᠯᠠ ᠢᠪᠡᠭᠡᠨᠡᠮ》 ᠭᠡᠰᠡᠨ ᠦᠭᠡ ᠵᠢᠨ ᠠᠮᠢᠳᠤ ᠵᠢᠱ᠌ᠢᠶᠡ ᠵᠢ ᠪᠦᠷᠢᠯᠳᠥᠭᠦᠯᠵᠦ᠂ ᠡᠭᠦᠨᠤ ᠤᠯᠠᠮᠠᠴᠠ ᠪᠣᠷᠣᠲᠣᠬᠣᠢ ᠵᠢᠨ ᠲᠦᠪᠰᠢᠨ ᠲᠠᠯᠠᠨᠢ 《ᠠᠷᠤ ᠭᠠᠵᠠᠷᠤᠨ ᠵᠢᠶᠠᠩᠨᠠᠨ᠂ ᠪᠣᠭᠣᠮᠲᠠ ᠵᠢᠨ ᠭᠠᠳᠠᠨᠠᠬᠢ ᠠᠮᠤ ᠵᠢᠨ ᠰᠠᠩ》 ᠪᠣᠯᠣᠭᠰᠠᠨ ᠪᠠᠶ᠋ᠢᠳᠠᠭ᠃ ᠬᠦᠢ᠍ᠰᠦ ᠪᠠᠷᠢᠯᠭᠠ ᠠᠰᠢᠭᠯᠠᠯᠲᠠᠳᠤ ᠣᠷᠣᠭᠰᠠᠨᠤ ᠳᠠᠷᠠᠭᠠ᠂ ᠳ᠋ᠧᠩ ᠰᠢᠶᠣᠣ ᠫᠢᠩ᠂ ᠫᠧᠩ ᠵᠧᠨ᠂ ᠤᠯᠠᠭ᠋ᠠᠨᠬᠦᠦ᠂ ᠵᠢᠶᠠᠩ ᠽᠧ ᠮᠢᠨ᠂ ᠴᠢᠶᠣᠣ ᠱ᠌ᠢ᠂ ᠪᠥᠬᠡ ᠵᠡᠷᠭᠡ ᠨᠠᠮ ᠪᠠ ᠲᠥᠷᠥ ᠵᠢᠨ ᠤᠳᠤᠷᠢᠳᠬᠤ ᠬᠥᠮᠥᠰ ᠡᠨᠳᠡ ᠢᠷᠡᠵᠦ ᠲᠣᠭᠣᠷᠢᠨ ᠪᠠᠶ᠋ᠢᠴᠠᠭ᠋ᠠᠵᠤ ᠥᠩᠭᠡᠷᠡᠵᠡᠢ᠃
ᠮᠥᠰᠥᠨ ᠰᠥᠩ ᠪᠣᠯ ᠡᠨᠳᠡᠬᠢ ᠡᠪᠦᠯᠤᠨ ᠤᠯᠠᠷᠢᠯᠤᠨ ᠴᠢᠬᠤᠯᠠ ᠦᠵᠡᠮᠵᠢ ᠵᠢᠨ ᠨᠢᠭᠡ ᠪᠢᠯᠡ᠃ ᠵᠠᠷᠢᠮ ᠦᠶᠡᠰ ᠮᠥᠰᠥᠨ ᠰᠥᠩᠨᠢ ᠬᠡᠳᠥᠨ ᠮᠢᠩᠭ᠋ᠠᠨ ᠮᠧᠲᠷ᠂ ᠴᠢᠨᠠᠭᠰᠢᠯᠠᠭ᠋ᠠᠳ ᠬᠡᠳᠥᠨ ᠠᠷᠪᠠᠨ ᠺᠢᠯᠣᠮᠧᠲᠷ ᠦᠷᠭᠦᠯᠵᠢᠯᠡᠵᠦ᠂ ᠪᠣᠯᠣᠷ ᠬᠣᠲᠠ ᠮᠡᠲᠦ ᠠᠤᠭᠠ ᠰᠦᠷᠯᠢᠭ ᠦᠵᠡᠮᠵᠢ ᠵᠢ ᠪᠦᠷᠢᠯᠳᠥᠭᠦᠯᠳᠡᠭ᠃ ᠦᠳᠡᠰᠢ ᠵᠢᠨ ᠪᠦᠷᠦᠢ ᠪᠠᠭᠤᠬᠤᠳᠤ ᠥᠩᠭᠡᠲᠦ ᠳ᠋ᠧᠩ ᠮᠢᠷᠠᠯᠵᠠᠵᠤ᠂ ᠰᠢᠷᠦᠭᠦᠨ ᠤᠷᠤᠰᠬᠠᠯᠤᠨ ᠨᠦᠷᠭᠢᠭᠡᠨ᠂ ᠰᠡᠷᠢᠭᠦᠨ ᠵᠢᠪᠠᠷᠤᠨ ᠰᠡᠩᠭᠢᠨᠡᠭᠡᠨᠨᠢ ᠲᠣᠭᠣᠷᠢᠨ ᠵᠤᠭ᠋ᠠᠴᠠᠭᠰᠠᠳᠤᠨ ᠰᠡᠳᠬᠢᠯᠢ ᠬᠥᠭᠰᠡᠭᠡᠨ ᠪᠠᠶᠠᠰᠬᠠᠨᠠ᠃
ᠲᠤᠰ ᠦᠵᠡᠮᠵᠢ ᠵᠢᠨ ᠣᠷᠣᠨᠨᠢ 2005 ᠣᠨᠳᠤ ᠤᠯᠤᠰᠤᠨ ᠤᠰᠤᠨ ᠠᠰᠢᠭᠯᠠᠯᠲᠠ ᠵᠢᠨ ᠦᠵᠡᠮᠵᠢ ᠵᠢᠨ ᠣᠷᠣᠨ ᠵᠶ᠋ᠠᠷ ᠦᠨᠡᠯᠡᠭᠳᠡᠵᠦ᠂ 2008 ᠣᠨᠳᠤ ᠤᠯᠤᠰᠤᠨ ᠭᠤᠷᠪᠠᠨ A ᠳᠡᠰᠤᠨ ᠵᠤᠭ᠋ᠠᠴᠠᠯᠤᠨ ᠦᠵᠡᠮᠵᠢ ᠵᠢᠨ ᠣᠷᠣᠨ ᠪᠣᠯᠵᠠᠢ᠃ ᠲᠤᠰ ᠭᠠᠵᠠᠷ ᠪᠣᠯ ᠪᠠᠰᠠ ᠴᠤ᠌ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨᠤ ᠡᠬᠡ ᠤᠯᠤᠰᠴᠢ ᠦᠵᠡᠯᠤᠨ ᠬᠥᠮᠥᠵᠢᠯᠤᠨ ᠰᠠᠭᠤᠷᠢᠨ ᠭᠠᠵᠠᠷᠤᠨ ᠨᠢᠭᠡ ᠪᠢᠯᠡ᠃ ᠦᠵᠡᠮᠵᠢ ᠵᠢᠨ ᠣᠷᠣᠨᠳᠤ ᠣᠳᠣ᠄ 《ᠲᠩᠷᠢ ᠵᠢᠨ ᠳᠣᠣᠷᠠᠬᠢ ᠨᠢᠭᠡᠳᠥᠭᠡᠷ ᠲᠣᠮᠣ ᠣᠨᠢᠰᠤ — ᠰᠡᠳᠬᠢᠯᠢ ᠬᠣᠯᠪᠣᠬᠤ ᠣᠨᠢᠰᠤ᠂ 《ᠲᠩᠷᠢ ᠵᠢᠨ ᠳᠣᠣᠷᠠᠬᠢ ᠨᠢᠭᠡᠳᠥᠭᠡᠷ ᠡᠷᠲᠡᠨᠤ ᠶᠠᠲᠤᠭᠠ》᠂ ᠲᠡᠮᠦᠷᠯᠢᠭ ᠱᠤᠭᠤᠮᠠᠯᠤᠨ ᠬᠦᠷᠢᠶᠡᠯᠡᠩ᠂ ᠬᠠᠲᠤᠨ ᠭᠣᠣᠯᠤᠨ ᠤᠰᠤᠨ ᠮᠠᠨᠳᠠᠯ᠂ ᠠᠮᠢᠲᠠᠨᠤ ᠬᠡᠢ ᠬᠦᠰᠡᠯᠤᠨ ᠬᠦᠷᠢᠶᠡᠯᠡᠩ ᠵᠡᠷᠭᠡ ᠦᠵᠡᠮᠵᠢ ᠵᠢᠨ ᠣᠷᠣᠨᠲᠠᠢ ᠪᠠᠶ᠋ᠢᠵᠤ᠂ ᠵᠤᠭ᠋ᠠᠴᠠᠯᠤᠨ ᠣᠩᠭᠣᠴᠠᠪᠠᠷ ᠲᠣᠭᠣᠷᠢᠬᠤ᠂ ᠮᠣᠲ᠋ᠣᠷᠲᠤ ᠵᠠᠪᠢᠪᠠᠷ ᠰᠤᠮᠤᠳᠠᠬᠤ᠂ ᠵᠢᠭ᠋ᠠᠰᠤ ᠭᠥᠬᠢᠳᠡᠬᠦ᠂ ᠰᠤᠷ ᠬᠠᠷᠪᠤᠬᠤ᠂ ᠡᠯᠡᠰᠦᠨᠳᠤ ᠵᠤᠭ᠋ᠠᠴᠠᠬᠤ᠂ ᠨᠤᠭᠤ ᠭᠠᠵᠠᠷᠲᠤ ᠤᠶ᠋ᠢᠮᠤᠬᠤ ᠵᠡᠷᠭᠡ ᠣᠯᠠᠨ ᠵᠤᠭ᠋ᠠᠴᠠᠯᠤᠨ ᠲᠥᠷᠥᠯ ᠵᠦᠢ᠍ᠯ ᠪᠤᠢ᠃
ᠢᠷᠡᠯᠲᠡ᠄ ᠳ᠋ᠸᠩᠺᠸᠦ ᠰᠢᠶᠠᠨᠤ ᠠᠷᠠᠳᠤᠨ ᠵᠠᠰᠠᠭᠤᠨ ᠣᠷᠳᠣᠨᠤ ᠮᠣᠩᠭᠣᠯ ᠰᠦᠯᠵᠢᠶᠡ